ಸೂರ್ಯಕಾಂತಿ
ಸೂರ್ಯಕಾಂತಿ ಮೊಸಾಯಿಕ್ ವೈರಸ್
Potyvirus helitessellati
ವೈರಸ್
ಸಂಕ್ಷಿಪ್ತವಾಗಿ
- ಎಲೆಗಳ ಮೇಲೆ ಹಳದಿ ಮತ್ತು ಹಸಿರು ಬಣ್ಣದ ಕಲೆಗಳು (ಮೊಸಾಯಿಕ್ ಮಾದರಿ) ಮೂಡುವುದು.
- ಎಲೆಯ ಮೇಲ್ಭಾಗದಲ್ಲಿ ಸಣ್ಣ ಹಳದಿ ಚುಕ್ಕೆಗಳು ಕಾಣಿಸಿಕೊಳ್ಳುವುದು.
- ಗಿಡಗಳು ಗಿಡ್ಡದಾಗುವುದು ಮತ್ತು ದುರ್ಬಲಗೊಳ್ಳುವುದು.
- ಸೂರ್ಯಕಾಂತಿ ಹೂವುಗಳು ಸರಿಯಾಗಿ ಬೆಳೆಯದೆ ಕಡಿಮೆ ಬೀಜಗಳು ರೂಪುಗೊಳ್ಳುವುದು.
ಇವುಗಳಲ್ಲಿ ಸಹ ಕಾಣಬಹುದು
ಸೂರ್ಯಕಾಂತಿ
ರೋಗಲಕ್ಷಣಗಳು
ಆರಂಭದಲ್ಲಿ, ಎಲೆಗಳ ಮೇಲೆ ತಿಳಿ ಮತ್ತು ಕಡು ಹಸಿರು ಬಣ್ಣದ ಕಲೆಗಳು (ಮೊಸಾಯಿಕ್ ಮಾದರಿ) ಕಾಣಿಸಿಕೊಳ್ಳುತ್ತವೆ. ಎಲೆಯ ಮೇಲ್ಭಾಗದಲ್ಲಿ ಸಣ್ಣದಾದ, ಪ್ರಕಾಶಮಾನವಾದ ಹಳದಿ ಚುಕ್ಕೆಗಳು ಮೂಡುತ್ತವೆ. ಈ ಲಕ್ಷಣಗಳು ಮೊದಲು ಗಿಡದ ಮೇಲ್ಭಾಗದ ಎಳೆಯ ಎಲೆಗಳಲ್ಲಿ ಕಂಡುಬರುತ್ತವೆ. ರೋಗ ಉಲ್ಬಣಗೊಂಡ ಲಕ್ಷಣಗಳು 3 ವಾರಗಳ ನಂತರ ಗೋಚರಿಸುತ್ತವೆ. ಗಿಡಗಳು ಆರೋಗ್ಯವಂತ ಸೂರ್ಯಕಾಂತಿ ಗಿಡಗಳಿಗಿಂತ ಗಿಡ್ಡದಾಗಿಯೇ ಉಳಿಯುತ್ತವೆ. ಸೂರ್ಯಕಾಂತಿ ಹೂವುಗಳು ಚಿಕ್ಕದಾಗಿರುತ್ತವೆ ಮತ್ತು ಸರಿಯಾಗಿ ಬೆಳೆಯುವುದಿಲ್ಲ. ಕಡಿಮೆ ಬೀಜಗಳು ರೂಪುಗೊಳ್ಳುತ್ತವೆ ಹಾಗೂ ಅವು ಗಾತ್ರದಲ್ಲಿ ಚಿಕ್ಕದಾಗಿರಬಹುದು. ತೀವ್ರತರವಾದ ಸಂದರ್ಭಗಳಲ್ಲಿ, ಎಲೆಗಳು ಕಂದು ಬಣ್ಣಕ್ಕೆ ತಿರುಗಿ ಉದುರಿಹೋಗುತ್ತವೆ.
ಶಿಫಾರಸುಗಳು
ಜೈವಿಕ ನಿಯಂತ್ರಣ
ಈ ವೈರಸ್ ರೋಗಕ್ಕೆ ಯಾವುದೇ ನೇರ ಜೈವಿಕ ಚಿಕಿತ್ಸೆ ಇಲ್ಲ. ದೀರ್ಘಕಾಲದ ವೈರಸ್ ತಡೆಗಟ್ಟುವಿಕೆಗಾಗಿ, ಪೇನು ನುಸಿಗಳನ್ನು ನಿಯಂತ್ರಿಸುವ ಜೈವಿಕ ವಿಧಾನಗಳನ್ನು ಉತ್ತಮ ಕೃಷಿ ಪದ್ಧತಿಗಳೊಂದಿಗೆ ಸಂಯೋಜಿಸಿ ಬಳಸಿ.
ರಾಸಾಯನಿಕ ನಿಯಂತ್ರಣ
ಯಾವ ರಾಸಾಯನಿಕಗಳೂ ರೋಗಪೀಡಿತ ಗಿಡಗಳನ್ನು ಗುಣಪಡಿಸಲು ಸಾಧ್ಯವಿಲ್ಲ. ಇದರ ನಿಯಂತ್ರಣವು ಕೇವಲ ಪೇನು ನುಸಿಗಳನ್ನು ತಡೆಯುವ ಮೂಲಕ ರೋಗ ಬರದಂತೆ ನೋಡಿಕೊಳ್ಳುವುದರ ಮೇಲೆ ಗಮನ ಹರಿಸುತ್ತದೆ. ವೈರಸ್ ಹರಡುವ ಮುನ್ನ, ಪೇನು ನುಸಿಗಳು ಮೊದಲು ಕಾಣಿಸಿಕೊಂಡ ತಕ್ಷಣವೇ ಕೀಟನಾಶಕಗಳನ್ನು ಬಳಸಿ. ಪೇನು ನುಸಿಗಳು ಅಡಗಿಕೊಳ್ಳುವ ಎಲೆಯ ಮೇಲ್ಭಾಗ ಮತ್ತು ಕೆಳಭಾಗ ಎರಡಕ್ಕೂ ಔಷಧಿ ಸಿಂಪಡಿಸಿ. ಗಾಳಿ ಜೋರಾಗಿ ಬೀಸುವ ದಿನಗಳಲ್ಲಿ ಅಥವಾ ಮಳೆಗೆ ಮುಂಚೆ ಔಷಧಿ ಸಿಂಪಡಿಸಬೇಡಿ. ಕೀಟಗಳು ನಿರೋಧಕ ಶಕ್ತಿಯನ್ನು ಬೆಳೆಸಿಕೊಳ್ಳುವುದನ್ನು ತಡೆಯಲು ಕೀಟನಾಶಕಗಳ ಪ್ರಕಾರಗಳನ್ನು ಬದಲಾಯಿಸುತ್ತಾ ಇರಿ. ಯಾವಾಗಲೂ ರಕ್ಷಣಾತ್ಮಕ ಉಡುಪುಗಳನ್ನು ಧರಿಸಿ ಮತ್ತು ಬಾಟಲಿಯ ಮೇಲಿನ ಸೂಚನೆಗಳನ್ನು ಪಾಲಿಸಿ.
ಅದಕ್ಕೆ ಏನು ಕಾರಣ
ಸೂರ್ಯಕಾಂತಿ ಮೊಸಾಯಿಕ್ ವೈರಸ್ ರೋಗವು ಪೋಟಿವೈರಸ್ ಹೆಲಿಟೆಸ್ಸೆಲಾಟಿ ಎಂಬ ವೈರಸ್ನಿಂದ ಬರುತ್ತದೆ. ಇದು ಜಗತ್ತಿನಾದ್ಯಂತ ಕಾಡು ತಳಿಗಳು ಸೇರಿದಂತೆ ಎಲ್ಲಾ ಸೂರ್ಯಕಾಂತಿ ತಳಿಗಳ ಮೇಲೂ ಪರಿಣಾಮ ಬೀರುತ್ತಿದೆ. ರೋಗಪೀಡಿತ ಬೀಜಗಳು ಹೊಸದಾಗಿ ಮಾಡುವ ಬಿತ್ತನೆಗೂ ವೈರಸ್ ಅನ್ನು ಹರಡಬಲ್ಲವು. ಹಸಿರು ಪೀಚ್ ಪೇನು ನುಸಿಗಳು ಈ ವೈರಸ್ ಅನ್ನು ರೋಗವಿರುವ ಗಿಡಗಳಿಂದ ಆರೋಗ್ಯವಂತ ಗಿಡಗಳಿಗೆ ಸಾಗಿಸುತ್ತವೆ. ಪೇನು ನುಸಿಗಳು ಹೆಚ್ಚು ಸಕ್ರಿಯವಾಗಿರುವ ಬೆಚ್ಚಗಿನ ಹವಾಮಾನದಲ್ಲಿ ಈ ವೈರಸ್ ವೇಗವಾಗಿ ಹರಡುತ್ತದೆ. ಈ ವೈರಸ್ ಕಾರ್ಮಿಕರ ಕೈಗಳು, ಬಟ್ಟೆಗಳು ಅಥವಾ ಕಲುಷಿತಗೊಂಡ ಕೃಷಿ ಉಪಕರಣಗಳ ಮೂಲಕವೂ ಇಡೀ ಹೊಲಕ್ಕೆ ಹರಡಬಹುದು.
ಮುಂಜಾಗ್ರತಾ ಕ್ರಮಗಳು
- ನಂಬಿಕಸ್ಥ ಮಾರಾಟಗಾರರಿಂದ ಪ್ರಮಾಣೀಕೃತ ವೈರಸ್ ಮುಕ್ತ ಬೀಜಗಳನ್ನೇ ಖರೀದಿಸಿ.
- ಕೃಷಿಗೆ ಬಳಸುವ ಎಲ್ಲಾ ಉಪಕರಣಗಳನ್ನು ಸ್ವಚ್ಛಗೊಳಿಸಿ.
- ಹೊಲದ ಸುತ್ತಮುತ್ತ ಇರುವ ಕಾಡು ಸೂರ್ಯಕಾಂತಿ ಮತ್ತು ಜಿನ್ನಿಯಾ ಗಿಡಗಳನ್ನು ಕಿತ್ತು ಹಾಕಿ.
- ಪೇನು ನುಸಿಗಳ ಕಾಟ ಕಡಿಮೆ ಇರುವಾಗ ಬಿತ್ತನೆ ಮಾಡಿ (ಹೆಚ್ಚಿರುವ ಸಮಯದಲ್ಲಿ ಬೇಡ).
- ಆರಂಭಿಕ ಲಕ್ಷಣಗಳು ಮತ್ತು ಪೇನು ನುಸಿಗಳನ್ನು ಪತ್ತೆಹಚ್ಚಲು ವಾರಕ್ಕೊಮ್ಮೆ ಗಿಡಗಳನ್ನು ಪರಿಶೀಲಿಸಿ.
- ರೋಗ ಪೀಡಿತ ಗಿಡಗಳನ್ನು ತಕ್ಷಣವೇ ಕಿತ್ತು - ಸುಟ್ಟುಹಾಕಿ ಅಥವಾ ಮಣ್ಣಿನಲ್ಲಿ ಹೂತುಹಾಕಿ.
- ವೈರಸ್ಗಳಿಗೆ ಆಶ್ರಯ ನೀಡುವ ಕಳೆಗಳನ್ನು ಹೊಲದಲ್ಲಿ ಬೆಳೆಯಲು ಬಿಡಬೇಡಿ.
- ಗಿಡಗಳನ್ನು ಮುಟ್ಟಿದ ನಂತರ ಕೈಗಳನ್ನು ತೊಳೆದುಕೊಳ್ಳಿ ಮತ್ತು ಉಪಕರಣಗಳನ್ನು ಸ್ವಚ್ಛಗೊಳಿಸಿ.
- ಬೆಳೆ ಪರಿವರ್ತನೆ ಮಾಡಿ - ಒಂದೇ ಹೊಲದಲ್ಲಿ 2-3 ವರ್ಷಗಳವರೆಗೆ ಸೂರ್ಯಕಾಂತಿ ಬೆಳೆಯಬೇಡಿ.
- ಹೊಸ ಬಿತ್ತನೆಯನ್ನು ರೋಗ ಪೀಡಿತ ಪ್ರದೇಶಗಳಿಂದ ದೂರವಿಡಿ.
- ಪೇನು ನುಸಿಗಳನ್ನು ಗೊಂದಲಕ್ಕೆ ದೂಡಲು ಬೆಳ್ಳಿಯ ಬಣ್ಣದ ಪ್ಲಾಸ್ಟಿಕ್ ಮಲ್ಚ್ ಬಳಸಿ.
ಶೇರ್ ಮಾಡು
ಪ್ಲಾಂಟಿಕ್ಸ್ ಡೌನ್ಲೋಡ್ ಮಾಡಿಕೊಳ್ಳಿ
