ಗಂಧಕದ ಕೊರತೆ (ಸಲ್ಫರ್ ಕೊರತೆ)

ರೋಗಲಕ್ಷಣಗಳು

ಗಂಧಕದ ಕೊರತೆಯಿರುವ ಎಲೆಗಳು ಸಾಮಾನ್ಯವಾಗಿ ಮೊದಲು ತಿಳಿ ಹಸಿರು, ನಂತರ ಹಳದಿ ಮಿಶ್ರಿತ ಹಸಿರು ಬಣ್ಣಕ್ಕೆ ತಿರುಗುತ್ತದೆ. ಬಳಿಕ ಸಂಪೂರ್ಣ ಹಳದಿಯಾಗುತ್ತದೆ. ಸಾಮಾನ್ಯವಾಗಿ ಕಾಂಡಗಳು ಕೆನ್ನೇರಳೆ ಬಣ್ಣ ಪಡೆಯುತ್ತವೆ. ಈ ಗುಣಲಕ್ಷಣಗಳು ಸಾಮಾನ್ಯವಾಗಿ ಸಾರಜನಕ-ಕೊರತೆಯಿರುವ ಸಸ್ಯಗಳಲ್ಲಿ ಕಂಡುಬರುವಂತೆಯೇ ಇರುತ್ತವೆ. ಇದರಿಂದ ಗೊಂದಲ ಉಂಟಾಗಬಹುದು. ಗಂಧಕದ ವಿಷಯದಲ್ಲಿ, ಮೊದಲಿಗೆ ಹೊಸದಾದ ಮೇಲಿನ ಎಲೆಗಳಲ್ಲಿ ಈ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಕೆಲವು ಬೆಳೆಗಳಲ್ಲಿ (ಗೋಧಿ ಮತ್ತು ಆಲೂಗಡ್ಡೆ) ಈ ಲಕ್ಷಣಗಳ ಬದಲಿಗೆ, ಎಲೆಗಳ ಮುಖ್ಯಭಾಗದಲ್ಲಿ ಚುಕ್ಕೆಗಳು ಅಥವಾ ಅಂತರ್ ನಾಳದ ಕ್ಲೋರೋಸಿಸ್ ಕಾಣಬಹುದು. ಎಲೆಗಳು ಸಣ್ಣಗೆ ಮತ್ತು ತೆಳ್ಳಗೆ ಬೆಳೆಯುತ್ತವೆ ಮತ್ತು ಅದರ ಕುಡಿ ಕೊಳೆತಂತಾಗಬಹುದು. ಗೆದ್ದೆಯಲ್ಲಿನ ಬಾಧಿತ ಪ್ರದೇಶಗಳು ದೂರದಿಂದ ನೋಡಿದಾಗ ತಿಳಿ ಹಸಿರು ಅಥವಾ ಪ್ರಕಾಶಮಾನವಾದ ಹಳದಿ ಬಣ್ಣದಲ್ಲಿ ಕಾಣಿಸುತ್ತವೆ. ಕಾಂಡಗಳು ಎತ್ತರ ಬೆಳೆಯಲು ತಡೆಯಾಗುತ್ತದೆ ಮತ್ತು ತೆಳ್ಳಗೆ ಇರುತ್ತವೆ. ಈ ಕೊರತೆ ಋತುವಿನ ಆರಂಭದಲ್ಲಿಯೇ ಕಂಡುಬಂದರೆ, ಸಸ್ಯದ ಬೆಳವಣಿಗೆ ಕುಂಠಿತವಾಗುತ್ತದೆ. ಕಡಿಮೆ ಹೂವು ಬಿಡುತ್ತದೆ. ಮತ್ತು ಹಣ್ಣುಗಳು/ಧಾನ್ಯಗಳ ಮಾಗುವಿಕೆ ವಿಳಂಬವಾಗುತ್ತದೆ. ಕಸಿ ಮಾಡಿದ ನಂತರ, ಗಂಧಕ ಕಡಿಮೆ ಇರುವ ಮಣ್ಣಿನಲ್ಲಿ ಬೆಳೆಯುವ ಗಿಡಗಳ ಸಾವಿನ ಪ್ರಮಾಣ ಇತರ ಮಣ್ಣಿನಲ್ಲಿರುವುದಕ್ಕಿಂತ ಹೆಚ್ಚಾಗಿರುತ್ತದೆ.