Diaporthe phaseolorum var. sojae
ಶಿಲೀಂಧ್ರ
5 mins to read
ಈ ಸೋಂಕಿನ ಗಮನಾರ್ಹ ಲಕ್ಷಣವೆಂದರೆ ಪಿಕ್ನೀಡಿಯಾ. ಪಿಕ್ನೀಡಿಯಾವೆಂದರೆ ಶಿಲೀಂಧ್ರದ ಒಂದು ಭಾಗ, ಇದು ಬೀಜಕಗಳನ್ನು ಹೊತ್ತಿರುತ್ತದೆ. ಇದು ಚಿಕ್ಕದಾದ ಕಪ್ಪಗಿನ ಚುಕ್ಕೆಗಳ ರೂಪದಲ್ಲಿ ಕಾಂಡ, ಬೀಜಕೋಶ, ಮತ್ತು ನೆಲಕ್ಕೆ ಬಿದ್ದ ಎಲೆಗಳ ತೊಟ್ಟುಗಳಲ್ಲೆಲ್ಲ ಸಾಲುಸಾಲಾಗಿ ಬೆಳೆಯುತ್ತವೆ. ಸೋಂಕಿತ ಗಿಡದ ಮೇಲ್ಭಾಗವು ಹಳದಿ ಬಣ್ಣಕ್ಕೆ ತಿರುಗಿ ಸತ್ತು ಹೋಗಬಹುದು. ಸೋಂಕಿತ ಬೀಜಗಳು ಬಿರುಕೊಡೆದು, ಸುಕ್ಕುಗಟ್ಟಿ ಮಸುಕಾಗಿ ಕಾಣಬಹುದು ಮತ್ತು ಊದಾ ಬೂಷ್ಟಿನಿಂದ ಮುಚ್ಚಿಕೊಂಡಿರಬಹುದು. ಸೋಂಕು ತಗುಲಿದ ಭಾಗಗಳು ಅವಧಿಗೆ ಮೊದಲೇ ಸಾಯುತ್ತವೆ
ಜೈವಿಕ ನಿಯಂತ್ರಣದ ಯಾವುದೇ ವಿಧಾನ ತಿಳಿದು ಬಂದಿಲ್ಲ. ಸೋಂಕಿನ ಸಾಧ್ಯತೆಯನ್ನು ಕಡಿಮೆ ಮಾಡುವ ಅಥವಾ ಅದರ ತೀವ್ರತೆಯನ್ನು ಕಡಿಮೆ ಮಾಡುವ ಯಾವುದಾದರೂ ವಿಧಾನ ಗೊತ್ತಿದ್ದರೆ, ದಯವಿಟ್ಟು ನಮಗೆ ತಿಳಿಸಿ.
ಲಭ್ಯವಿದ್ದರೆ, ಸಾವಯವ ಚಿಕಿತ್ಸೆಗಳೊಂದಿಗೆ ನಿರ್ಬಂಧಕ ಮಾರ್ಗಗಳನ್ನು ಸೇರಿಸಿ ಸಮಗ್ರ ವಿಧಾನವನ್ನು ಮೊದಲು ಪರಿಗಣಿಸಿ. ಬೀಜ ಮೂಡುವ ಸಮಯದ ಶುರುವಿನಲ್ಲಿ ಎಲೆಗಳಿಗೆ ಸಿಂಪಡಿಸುವ ಶಿಲೀಂಧ್ರನಾಶಕಗಳನ್ನು ಉಪಯೋಗಿಸುವುದರಿಂದ ಬೀಜದ ಗುಣಮಟ್ಟವನ್ನು ಉಳಿಸಿಕೊಳ್ಳಬಹುದು. ಬೀಜಕೋಶ ಮೂಡಿದಾಗಿನಿಂದ ಕೊನೆಯ ಹಂತದವರೆಗೂ ಶಿಲೀಂಧ್ರನಾಶಕಗಳನ್ನು ಬಳಸುವುದರಿಂದ ಬೀಜ ಸೋಂಕಿನ ಸಂಭವವನ್ನು ಕಡಿಮೆ ಮಾಡುತ್ತದೆ. ಬೀಜಕ್ಕೆ ಸೋಂಕು ತಗುಲಿದ್ದಲ್ಲಿ ಬಿತ್ತನೆಗೆ ಮೊದಲು (ಬೆನೋಮಿಲ್ನಂತಹ ಶಿಲೀಂಧ್ರನಾಶಕಗಳಿಂದ) ಸಂಸ್ಕರಿಸಬೇಕು.
ಡಯಾಪೋರ್ತೆ ಫಾಸಿಯೋಲೋರಮ್ ಎಂಬ ವರ್ಗದ ಶಿಲೀಂಧ್ರಗಳೇ ಈ ಸೋಂಕಿಗೆ ಕಾರಣ. ಇದನ್ನು ಫೊಮೋಸಿಸ್ ಸೋಜೇ ಎಂದು ಕೂಡ ಕರೆಯುತ್ತಾರೆ. ಸೋಂಕಿತ ಬೀಜ ಮತ್ತು ಬೆಳೆ ಶೇಷಗಳಲ್ಲಿ ಈ ಶಿಲೀಂಧ್ರವು ಬದುಕುತ್ತದೆ. ಸೋಂಕು ತಗುಲಿದ ಬೀಜಗಳು ಮುರುಟಿಕೊಳ್ಳುತ್ತವೆ, ಬಿರುಕೊಡೆಯುತ್ತವೆ, ಶಿಲೀಂಧ್ರದ ಮೈಸೀಲಿಯಮ್ಮಿನಿಂದ ಮುಚ್ಚಲ್ಪಟ್ಟಿರುತ್ತವೆ. ಸೋಂಕು ತೀವ್ರವಿದ್ದಲ್ಲಿ ಬೀಜ ಮೊಳಕೆಯೊಡೆಯದೆ ಇರಬಹುದು. ಬೀಜಕೋಶ ಬೆಳೆಯುವಾಗ ಮತ್ತು ಮಾಗುವ ಸಮಯದಲ್ಲಿ ಅದು ಬೆಚ್ಚಗಿನ, ಆರ್ದ್ರ ಹವೆಗೆ ಹೆಚ್ಚು ಕಾಲ ತೆರೆದುಕೊಂಡಿದ್ದಲ್ಲಿ ಸೋಂಕು ಬೀಜಕೋಶದಿಂದ ಬೀಜಕ್ಕೆ ವರ್ಗವಾಗುತ್ತದೆ. ಬೀಜಕೋಶವು ತುಂಬಿಕೊಳ್ಳುವ ಸಮಯದಲ್ಲಿ ತುಂಬಾ ಆರ್ದ್ರ ಹವೆಯಿದ್ದಲ್ಲಿ ಕಾಂಡಕ್ಕೆ ಸೋಂಕು ತಗುಲುವ ಸಾಧ್ಯತೆ ಹೆಚ್ಚು. ರೋಗಕಾರಕವು ಬೀಜದ ಗುಣಮಟ್ಟ ಕೆಡಿಸುತ್ತದೆ ಹಾಗೂ ತೀವ್ರ ಬೆಳೆಹಾನಿಗೆ ಕಾರಣವಾಗುತ್ತದೆ.