ಆಲ್ಟರ್ನೇರಿಯಾ ಕಂದು ಚುಕ್ಕೆ

ರೋಗಲಕ್ಷಣಗಳು

ಆರಂಭದಲ್ಲಿ, ಚಿಕ್ಕ ಎಲೆಗಳ ಮೇಲೆ ಸಣ್ಣ ಕಂದು ಅಥವಾ ಕಪ್ಪು ಬಣ್ಣದ ಕಲೆಗಳ ರೀತಿಯಲ್ಲಿ ಗಾಯಗಳು ಬರುತ್ತವೆ. ಅದರ ಸುತ್ತ ಹಳದಿ ಬಣ್ಣದ ಪ್ರಭಾವಾಲಯಗಳಿರುತ್ತವೆ, ಸಾಮಾನ್ಯವಾಗಿ ಅಂಚಿನಲ್ಲಿ. ಗಾಯಗಳು ಅನಿಯಮಿತ ಅಥವಾ ವೃತ್ತಾಕಾರದ ನೆಕ್ರೋಟಿಕ್ ಗಾಯಗಳಾಗಿ ಹರಡಿ ಎಲೆಗಳ ಬಹುಪಾಲು ಎಲ್ಲಾ ಭಾಗವನ್ನು ಆವರಿಸುತ್ತವೆ. ನೆಕ್ರೋಸಿಸ್ ಮತ್ತು ಕ್ಲೋರೋಸಿಸ್ ಎಲೆಗಳ ಸಿರೆಗಳಲ್ಲಿ ಸಹ ಹರಡಬಹುದು. ಗಾಯಗಳು ಚಪ್ಪಟೆಯಾಗಿರುತ್ತವೆ ಮತ್ತು ಎಲೆಗಳ ಮೇಲೆ ಎರಡೂ ಬದಿಗಳಲ್ಲಿ ಕಾಣುತ್ತವೆ. ಹಳೆಯ ಗಾಯಗಳ ಮಧ್ಯದಲ್ಲಿ ಪುಡಿಯಾದ ಕಾಗದದಂತಹ ವಿನ್ಯಾಸ ಕಂಡುಬರುತ್ತದೆ. ಬಲಿಯದ ಹಣ್ಣುಗಳಲ್ಲಿ ಹಳದಿ ಪ್ರಭಾವಾಲಯವಿರುವ ಸ್ವಲ್ಪ ಕುಳಿಬಿದ್ದ ಗಾಢ ಬಣ್ಣದ ಕಲೆಗಳು ಕಂಡುಬರುತ್ತವೆ. ಪಕ್ವವಾಗಿರುವ ಹಣ್ಣಿನ ಮೇಲೆ, ಗಾಯಗಳು ಸಣ್ಣ ಚುಕ್ಕೆಗಳಿಂದ ದೊಡ್ಡ ಕಲೆಗಳಾಗಿ ಬದಲಾಗಬಹುದು. ಹಣ್ಣಿನ ಸಿಪ್ಪೆಯ ಮೇಲೆ ಗಡುಸಾದ ಅಂಗಾಂಶದ ಪದರ ರೂಪುಗೊಳ್ಳುತ್ತದೆ. ಇದು ಮೇಲ್ಭಾಗದಿಂದ ಹೊರಬಂದಂತೆ ಕಂಡುಬರುತ್ತದೆ. ಗಡುಸಾದ ಅಂಗಾಂಶವು ಬಿದ್ದುಹೋದರೆ, ಕುಳಿಗಳು ಅಥವಾ ಕಲೆಗಳು ಕಾಣಿಸುತ್ತವೆ. ಹಣ್ಣು ಅಕಾಲಿಕವಾಗಿ ಉದುರುವುದು ಸಾಮಾನ್ಯವಾಗಿರುತ್ತದೆ.