Dengu Nyeusi & Kijani

Doa Jani Cercospora la Mimea Jamii ya Mikunde

Cercospora canescens

Kuvu

Ponya zao lako

Piga picha

Angalia uchunguzi

Pata dawa

Pata programu ya Plantix

Kwa Ufupi

  • Madoa madogo ya duara yenye rangi ya kahawia iliyofifia, yakiwa yamezungukwa na kingo za rangi kahawia yenye wekundu kwenye majani.
  • Madoa huonekana kwenye matawi na maganda mabichi.
  • Majani hupukutika kwa wingi.
  • Kupungua kwa mavuno.

Inaweza pia kupatikana kwenye

4 Mazao
Maharage
Dengu Nyeusi & Kijani
Njugu Mawe & Dengu Nyekundu
Soya

Dengu Nyeusi & Kijani

Dalili

Dalili hutofautiana kidogo kutegemeana na nguvu ya vimelea na aina ya mmea. Madoa madogo ya duara na yenye maji yakiwa na rangi ya kahawia katikati na duara la mwanga wa njano hutokea kwanza kwenye majani wiki ya 3-5 baada ya kupanda zao. Katika hatua za baadaye za ugonjwa, madoa huongezeka na kuwa na rangi ya kahawia (kutokana na kufa kwa tishu za majani), kingo zenye rangi ya kahawia iliyochanganyika na wekundu ambazo zinaonekana zimebonyea kidogo. Madoa haya yanaweza pia kutokea kwenye sehemu zote za mmea, hususani kwenye maganda mabichi. Katika mazingira muafaka kwa ugonjwa huu, madoa mengi kwenye majani yanaweza kusababisha majani kupukutika kwa wingi wakati wa kutoa maua na utengenezaji maganda. Kuvu (ukungu) hukua juu na ndani ya maganda, na kuyaharibu kabisa, na mara nyingi kusababisha upotevu wa mavuno kwa asilimia 100.

Mapendekezo

Udhibiti wa Kiasili

Matibabu ya mbegu kwa kutumia maji ya moto yanawezekana. Matumizi ya mafuta ya mwarobaini pia yana ufanisi katika kupunguza makali ya ugonjwa (idadi kubwa ya maganda na mbegu, maganda yenye afya, na uzito wa juu).

Udhibiti wa Kemikali

Daima zingatia mbinu jumuishi zenye hatua za kinga pamoja na tiba za kibailojia ikiwa zinapatikana. Ikiwa matibabu kwa kutumia dawa za kuua kuvu/ukungu yanahitajika, tumia dawa zenye mancozeb, chlorothalonil kwa kipimo cha 1g/l, au thiophenate methyl kwa kipimo cha 1 ml mara mbili kwa kila baada ya siku 10.

Ni nini kilisababisha?

Ugonjwa wa madoa kwenye majani unasababishwa na kuvu anayefahamika kitaalamu kama Cercospora canescens, ambae huambukiza choroko nyeusi na za kijani. Kuvu huyu husambazwa kwa njia ya mbegu na anaweza kuishi kwa zaidi ya miaka miwili kwenye mabaki ya mimea yaliyoko ardhini. Kupitia mfumo wa mizizi, kuvu wanaweza kusafiri kwa umbali mrefu ndani ya udongo. Kuvu hawa pia hustawi kwenye mimea mbadala inayoweza kuhifadhi vimelea au kwenye mazao yanayoota yenyewe shambani. Usambaaji wa kuvu hadi sehemu za chini za mmea hutokea kupitia rasharasha za maji na hewa. Hali ya joto la juu wakati wa mchana na usiku, udongo wenye unyevu, unyevu mwingi wa anga, au mvua kubwa; yote hayo yanatengeneza mazingira muafaka ya kusambaza kuvu.

Hatua za Kuzuia

  • Hakikisha udongo unapitisha maji vizuri.
  • Tumia mbegu kutoka kwenye mimea yenye afya au kutoka kwenye vyanzo vilivyothibitishwa kutokuwa na magonjwa.
  • Panda aina ya mbegu zinazostahimili au kuvumilia magonjwa.
  • Panda kwa kuchelewa ili kuepuka uharibifu wa miundo ya maua.
  • Panda pamoja na mazao marefu ya nafaka au zao la ulezi ili kuzuia usambaaji wa wadudu kati ya mistari.
  • Acha nafasi ya kutosha kati ya mimea ili kuruhusu mzunguko mzuri wa hewa.
  • Funika mimea kwa matandazo ili kuzuia kusambaa kwa kuvu (ukungu) hadi kwenye majani ya chini.
  • Hakikisha shamba linakuwa safi kwa kuondoa mabaki yote ya mimea na kuyachoma.
  • Safisha vifaa vilivyochafuliwa.
  • Epuka kufanya kazi shambani wakati mimea imelowana.
  • Fanya mzunguko wa mazao na mazao yasiyoathirika na ugonjwa huo.

Pakua Plantix